Tragjedia në Venezuelë thellohet, numri i viktimave nga tërmetet kalon 5200
Të paktën 5208 persona kanë humbur jetën si pasojë e tërmeteve shkatërruese që tronditën Venezuelën më 24 qershor, sipas shifrave më të reja të bëra publike të dielën nga Jorge Rodriguez, kreu i Asamblesë Kombëtare.
Të dhënat e përditësuara shënojnë një rëndim të mëtejshëm të bilancit tragjik, krahasuar me një ditë më parë kur autoritetet kishin konfirmuar 5119 vdekje. Megjithatë, numri i personave që kanë mbetur të plagosur vijon të jetë 16,740.
Sipas burimeve zyrtare, rreth 100 viktima të reja janë shtuar në 24 orët e fundit, më shumë se tri javë pas lëkundjeve me magnitudë 7.2 dhe 7.5 ballë, të cilat shkaktuan shkatërrime masive, veçanërisht në pjesën veriore të vendit.
Shteti bregdetar La Guaira, që ndodhet në afërsi të kryeqytetit Caracas, vijon të jetë epiqendra e dëmeve. Atje, skuadrat e shpëtimit po vazhdojnë pa ndërprerë operacionet e kërkimit mes rrënojave të pallateve të rrëzuara.
Ndërkohë që autoritetet ende nuk kanë dhënë një shifër zyrtare për të zhdukurit, Kombet e Bashkuara patën vlerësuar një ditë pas katastrofës se numri i personave që nuk dihet fati i tyre mund të shkonte në 50 mijë, ndërsa burime të tjera e ulin këtë vlerësim në rreth 10 mijë.
Pasojat humanitare mbesin po aq dramatike. Më shumë se 21 mijë qytetarë po strehohen në mbi 100 kampe të improvizuara. Sipas statistikave zyrtare, tërmetet dëmtuan 856 struktura, ndërsa 190 të tjera janë shembur plotësisht.
