‘Tërmet’ te Milani, zyrtarizohen shkarkimet e Igli Tares, Max Allegrit, Furlanit dhe Moncadas
Pas dështimit për t’u kualifikuar për në Champions League, Milani ka shkarkuar gjithë zinxhirin komandues teknik të klubit.
Presidenti Gerry Cardinale ka vendosur të bëjë revolucion të plotë te Milani pas dështimit për t’u kualifikuar në Champions League sezonin e ardhshëm. Pronari i klubit kuqezi ka marrë vendimin drastik për të ndryshuar drejtimin sportiv dhe teknik të skuadrës, duke shkarkuar trajnerin Massimiliano Allegri, drejtorin sportiv Igli Tare, drejtuesin ekzekutiv Giorgio Furlani dhe drejtorin teknik Geoffrey Moncada.
Në komunikatën zyrtare të publikuar nga klubi thuhet se objektivi kryesor i sezonit ishte rikthimi në Champions League dhe ndërtimi i një skuadre konkurruese për titullin në Serie A. Sipas drejtuesve, Milani qëndroi për një pjesë të mirë të sezonit në dy vendet e para të renditjes dhe kishte shanse reale për të luftuar për trofeun, por fundi negativ i kampionatit dhe humbja e fundit e kthyen sezonin në një dështim të qartë.
