Vala e të nxehtit godet SHBA-në, temperaturat arrijnë 44°C

I nxehti ka thyer rekorde këtë javë në SHBA dhe pritet të vazhdojë deri në fundjavë në të gjitha qytetet perëndimore dhe të zgjerohet drejt lindjes.

Katër zona në rajonin e shkretëtirës pranë kufirit midis Kalifornisë dhe Arizonës regjistruan 44.4°C të premten, një rekord kombëtar për muajin mars.

Këto vende ndodhen pranë qytetit Yuma dhe në Martinez Lake në Arizona, si dhe në zonat përreth Winterhaven dhe Ogilby në Kaliforni.

Deri tani, 65 qytete kanë regjistruar temperatura rekord për muajin mars, nga Arizona dhe Kalifornia deri në Idaho, raportoi Weather.com.

Në Luginën e Vdekjes të enjten temperaturat arritën në 40°C, ndërsa San Francisko, që zakonisht është freskët dhe me mjegull, barazoi rekordin historik për mars me 29°C. Ndërkohë, në Kolorado, skiatorët po zbrisnin pistat pa bluza.

Shërbimi Kombëtar i Motit lëshoi paralajmërime për nxehtësi ekstreme të premten për pjesën më të madhe të jugperëndimit të SHBA-së, nga Los Anxhelosi dhe bregdeti jugor i Kalifornisë deri në Las Vegas.

Gjithashtu u dhanë paralajmërime që njerëzit të mos lënë fëmijë ose kafshë shtëpiake në makina.

Kjo valë e jashtëzakonshme nxehtësie, në një kohë kur dimri sapo ka përfunduar, ka shqetësuar ekspertët e klimës.

“Një valë e tillë nxehtësie do të ishte praktikisht e pamundur në këtë periudhë të vitit në një botë pa ndryshimet klimatike të shkaktuara nga njeriu,” tha rrjeti i shkencëtarëve World Weather Attribution në një raport.

Ata e cilësuan ngjarjen si aq të rrallë, sa edhe pse temperaturat po rriten në përgjithësi, diçka e tillë pritet të ndodhë vetëm një herë në 500 vjet.

“Këto gjetje nuk lënë vend për dyshim. Ndryshimet klimatike po shtyjnë motin drejt ekstremeve që dikur ishin të paimagjinueshme në botën para-industriale. Kjo është ngrohje globale,” tha një nga autorët e studimit, profesoresha Friederike Otto nga Imperial College London.

Shkencëtarët thonë se ka prova të forta që valët e të nxehtit janë një shenjë e qartë e ngrohjes globale, një proces i nxitur kryesisht nga djegia e karburanteve fosile.

Me hemisferën veriore që ka dalë zyrtarisht nga dimri të premten, dita e parë e pranverës astronomike, temperaturat e larta po shkaktojnë dëme në natyrën e perëndimit të SHBA-së.

Shumë bimë dhe pemë tashmë kanë lulëzuar, ndërsa vegjetacioni po rritet me shpejtësi të madhe, i nxitur nga shirat e shumtë të dhjetorit dhe janarit.