Ushtria siriane vazhdon avancimin në provincën Raka
Ushtria siriane njoftoi sot se forcat e saj kanë vendosur kontrollin mbi zonën al-Rasafa dhe kështjellën e saj historike në jug të provincës Raka, në verilindje të Sirisë, si dhe mbi shtatë fshatra përreth, transmeton Anadolu.
Në një deklaratë për Agjencinë Siriane të Lajmeve (SANA), Komanda e Operacioneve e ushtrisë tha se ky avancim ka rritur presionin mbi Bazën Ajrore Ushtarake Tabqa, e cila, sipas saj, përdoret nga terroristët e PKK-së si bazë kryesore për operacionet e tyre.
Ky përparim vjen ndërkohë që ushtria ka njoftuar se forcat e saj po avancojnë drejt aeroportit ushtarak Tabqa, në kuadër të dislokimeve të vazhdueshme në perëndim të lumit Eufrat, pas tërheqjes së organizatës terroriste YPG/SDF.
Më herët të sot, ushtria siriane bëri të ditur se kishte marrë nën kontroll qytetin Dibsi Afnan dhe ishte duke u drejtuar drejt Tabqas në provincën Raka. Po ashtu, ajo njoftoi se kishte vendosur kontroll të plotë ushtarak mbi qytetet Deir Hafir dhe Maskanah në lindje të provincës Halep.
Këto zhvillime vijnë pasi Ferhat Abdi Shahin, një nga drejtuesit e organizatës terroriste YPG/SDF, e cila është objektiv i një operacioni ushtarak të ushtrisë në perëndim të Eufratit, pretendoi se elementët terroristë do të tërhiqeshin në rajonet në lindje të lumit, duke filluar nga ora 07:00 sipas kohës lokale.
Në mars 2025, presidenca siriane njoftoi një marrëveshje për integrimin e organizatës terroriste YPG/SDF në institucionet shtetërore, duke riafirmuar unitetin territorial të vendit dhe duke hedhur poshtë çdo përpjekje për ndarje.
Megjithatë, autoritetet thonë se SDF-ja nuk i ka respektuar kushtet e këtyre marrëveshjeve.
Qeveria siriane ka intensifikuar përpjekjet për rikthimin e sigurisë në mbarë vendin që nga rrëzimi i regjimit të Bashar al-Asadit në dhjetor 2024, pas 24 vitesh në pushtet.
