Rritet numri i i të sëmurëve me grip në raport me vitet paraprake
Gjatë javës së 52-të të vitit 2023 (25.12.-31.12.2023), në vend janë raportuar 403 raste të gripit ose sëmundjeve të ngjashme me gripin, që është 96,6% më shumë në krahasim me javën e kaluar, njoftoi Instituti i shëndetit publik.
Numri i personave të raportuar krahasuar me javën e 52-të të sezonit të kaluar është rritur për 16,1%, ndërsa krahasuar me 13 sezonet e mëparshme është më i lartë për 79,0%.
Incidenca e raportuar është nën kufirin javor të aktivitetit sezonal të virusit të gripit, gjegjësisht ende nuk është arritur pragu i hyrjes në sezonin e gripit.
Për sa i përket shpërndarjes së moshës, 151 persona janë të moshës 15-64 vjeç, 108 janë fëmijë të moshës
nga 0-4 vjeç, 115 fëmijë 5-14 vjeç dhe 29 janë persona mbi 65 vjeç. Incidenca më e lartë është regjistruar tek fëmijët e moshës 0-4 vjeç.
Gjatë kësaj jave është regjistruar një vdekje nga gripi. Bëhet fjalë për një person 67 vjeç nga Shkupi i cili ishte i shtruar në Klinikën për sëmundje infektive dhe gjendje febrile në Shkup. Tek personi i vdekur është konstatuar prania e sëmundjeve shoqëruese (sëmundje kardiovaskulare, obeziteti dhe malinje) dhe nuk ishte vaksinuar me një vaksinë kundër gripit sezonal. Te personi i vdekur është konfirmuar laboratorikisht Influenza A(H1).
Në sezonin 2023/2024, numri i përgjithshëm i rasteve me sëmundje të ngjashme me gripin është 1.293.
Krahasuar me periudhën e njëjtën të sezonit të kaluar, numri i rasteve të raportuara është rritur për 39,0%, ndërsa në krahasim me modelin e 13 sezoneve të fundit, është regjistruar një rritje prej 20,0%.
