Presidenti turk Erdogan mbërrin në Katar për vizitë zyrtare

Pas angazhimeve në Kuvajt, presidenti turk Recep Tayyip Erdoğan mbërriti në Doha të martën për një vizitë zyrtare me ftesë të emirit të Katarit, Sheikh Tamim bin Hamad Al-Thani, raporton Anadolu.

Erdoğan u prit me një ceremoni zyrtare në Aeroportin Ndërkombëtar Hamad.

Zëvendëskryeministri dhe ministri i Mbrojtjes i Katarit, Sheikh Saoud bin Abdulrahman bin Hassan bin Ali Al-Thani, zyrtarë të tjerë të lartë të Katarit dhe Ambasadori i Turqisë, Mustafa Goksu, ishin ndër zyrtarët që e pritën presidentin turk.

Gjatë vizitës së tij, Erdoğan pritet të takohet me emirin e Katarit për bisedime dypalëshe dhe në nivel delegacioni.

Ai gjithashtu do të marrë pjesë në takimin e 11-të të Komitetit të Lartë Strategjik Turqi-Katar, ku dy palët pritet të nënshkruajnë disa marrëveshje bashkëpunimi.

Katari është ndalesa e dytë e turneut treditor të Erdoğanit në Gjirin Persik, i cili përfshin edhe Omanin.