4 gra dhe 4 fëmijë në mesin e 14 të vrarëve në sulmet e fundit izraelite në Gaza
Të paktën 14 palestinezë u vranë, duke përfshirë katër gra dhe katër fëmijë, dhe dhjetëra të tjerë u plagosën ndërsa ushtria izraelite vazhdoi sulmet e saj ndaj palestinezëve në Rripin e Gazës, duke synuar qytetin Khan Younis dhe kampin Nuseirat me sulme ajrore sot herët në mëngjes, transmeton Anadolu.
Sipas agjencisë palestineze të lajmeve Wafa, 11 palestinezë u vranë dhe 15 të tjerë u plagosën kur avionët luftarakë izraelitë bombarduan një shtëpi në lagjen Al-Amal në perëndim të Khan Younisit në jug të Rripit të Gazës.
Po ashtu, tre palestinezë të tjerë u vranë dhe disa të tjerë u plagosën në një sulm ajror izraelit në një apartament banimi në Kullat Ayn Jalut në kampin Nuseirat të Gazës qendrore, tha agjencia e lajmeve.
Izraeli ka vazhduar ofensivën e tij në Gaza pas një sulmi të grupit të rezistencës palestineze Hamas më 7 tetor 2023, pavarësisht nga një rezolutë e Këshillit të Sigurimit të OKB-së që bën thirrje për armëpushim të menjëhershëm.
Sulmet izraelite, krahas shkatërrimit masiv, kanë rezultuar në mbi 40.200 palestinezë të vrarë, kryesisht gra dhe fëmijë, dhe mbi 93.000 të plagosur, sipas autoriteteve lokale shëndetësore.
Bllokada e vazhdueshme e Gazës ka çuar në mungesa të mëdha të ushqimit, ujit të pastër dhe ilaçeve.
Izraeli përballet me akuza për gjenocid në Gjykatën Ndërkombëtare të Drejtësisë (GJND), e cila ka urdhëruar ndalimin e operacioneve ushtarake në qytetin jugor Rafah, ku mbi një milion palestinezë kishin kërkuar strehim përpara se zona të pushtohej më 6 maj.
